غربة وطن


مين قال ان الغربة انك تبعد عن بلدك
اتكلمت في الموضوع دا كتير قبل كدة
ويمكن افضل اتكلم فيه لحد ما اخلص سنين الكلية
وارجع وطني
الام وطن
الاخت وطن
الاخ وطن
والحبيب وطن
الصديق وطن
العم وطن
الخال وطن
كل شخص في حياتنا فهو وطن لينا
انا حاسة اني فاقدة كل دول
يمكن يكون في حجات منهم موجودة
بس مش حاسة ان دا الوطن الانا عايزاه
عايزة الوطن الكنت عايشة فيه مع بابا وماما واخواتي

لما كنا بنتخانق على حجات تافهة
كتير بسال نفسي لو كان حالنا فضل
لما كنا مستورين بجدار حاجز قدام العالم كله

وتطرأت عليه التغيرات دي كان ايه الهيحصل
وطني هوة المكان العشت فيه
واتعلمت فيه
اخدت اخلاقي وقيمي منه
عملت صداقاتي فيه
قضيت فيه طفلتي
ضحكت فيه من قلبي
ضحكة نسيتها من زمان وكل ما ارجعها لحظات وتختفي تاني

عايزة ارجع وطني لاني حاسة بغربة في بلدي وفي وسط اهلي
اصبح احسن بالنسبالي اني امشي في الشارع لوحدي

في وسط ناس معرفهمش ولا اني اقعد في وسط ناس عارفاهم وعارفني
لان المجاملة والوش المتصنع مش بيظهر غير في وسط الناس دي
مجاملات مجاملات مجاملات ضيوف وواجب واخلاق واحترام .........
وحجات كتير ووش غريب لازم تفضل لابسه طول اليوم
انا بحب اتعامل على طبيعتي مع ناس حبة وجودي وحبة وجودهم

كل دي غربة
لما ضحكتك تكون بحساب والكلمة بالف حساب
لما تهرب من التجمعات
لما تحس انك بتضيع وقتك مع ناس المفروض مش معتبرينك منهم
دي كلها غربة
غربة وطن هي اصعب غربة ممكن الواحد يحسها

لحظة



في لحظة ليل ظلامه قاتم  جوه بارد 
مشتاء لحضن دافي وقلب صافي 
يشيل هموم الدنيا من على كتافي 
يسمعني من جواه ويحسسني بالامان 
لحظة اشتياق لسنين العمر الراحوا
لحظة ضحكة كانت بتطلع من القلب تهز كل هم قاتل 
لحظة جنون بتخترق كل القوانين مش هاممها اي سور 
لحظة اللمة الحلوة بتغني عن الدنيا 
لحظة صحاب حياتي 
لحظة ثقة ان بكرة احسن 
لحظة هد اي احباط يهز العزم
لحظة ذكريات تهون الجاي 
لحظة امل ان ف بكرة امل 
لحظة اب  
لحظة اخ 
لحظة ام  
لحظة اخت 
لحظة رفيق 
 لحظة قريب 
لحظات كتير في لحظة واحدة تسلمك لقطر الحياه 
تجري مع القطر وتنسي المكان 
وينسوك الناس 
تتهد الروابط 
تنكسر العلاقات 
وتتمحي ذكريات سنين ........... في لحظة 
لحظات راحت 
منها ممكن يرجع  تاني 
وشوية  يرجع والجرح فيها 
وكتير منها اخد سكة طريق بلا عودة 


قلب صغير لسة مطلعش للدنيا 
 مكسور مجروح وحيد متغير 
هدته لحظات كتير بتعدي عليه تدوسه من غير شفقة 
قلب سيطر عليه الاحباط من ان بكرة احلى 
وان في امل في الحياه 
وان الضحكة ممكن تطلع منه تاني 
ضحك على الوش من غير احساس 
مزيفة بتستمر للحظة وتتنسي العمر 
خاب ظنه في ناس كتير 
استهتار بمشاعر وانه في جواه نبض للحياه 


وبعد دا كله بيسالوه متغير ليه